LDB Bank ປະກາດຜົນປະກອບການ ປະຈຳປີ 2023 ເພີ່ມຂຶ້ນ 102% ທຽບໃສ່ປີທີ່ຜ່ານມາ

ໃນວັນທີ 03-05 ມັງກອນ 2024 ທີ່ຜ່ານມາ, ທະນາຄານ ພັດທະນາລາວ ຈໍາກັດ (ທພລ) ໄດ້ດໍາເນີນກອງປະຊຸມ ສະຫຼຸບຜົນການດໍາເນີນທຸລະກິດ ປະຈຳປີ 2023 ແລະ ວາງທິດທາງການດໍາເນີນທຸລະກິດ ປະຈໍາປີ 2024 ທີ່ໂຮງແຮມ ຄລາວ ພຣາຊ່າ ນະຄອນຫຼວງວຽງຈັນ ພາຍໃຕ້ການເປັນປະທານຮ່ວມ ຂອງທ່ານ ສິດທິສອນ ເທບພາສີ ປະທານສະພາບໍລິຫານ ທພລ, ທ່ານ ຈັນທະໜອມ ພົມມະນີ ປະທານຄະນະກໍາມະການບໍລິຫານງານ ທພລ ໂດຍມີ ຄະນະທີ່ປຶກສາ, ຄະນະຜູ້ອໍານວຍການ, ຄະນະຝ່າຍ, ຄະນະສາຂາພາກ, ສາຂານ້ອຍ, ຄະນະຂະແໜງ, ໜ່ວຍບໍລິການ ແລະ ພະນັກງານວິຊາການກ່ຽວຂ້ອງ ເຂົ້າຮ່ວມ.

ກອງປະຊຸມໄດ້ລາຍງານໃຫ້ຮູ້ວ່າ: ຜົນການດໍາເນີນທຸລະກິດ ປະຈຳປີ 2023 ຂອງ ທພລ ມີຜົນກໍາໄລສຸດທິ ຈໍານວນ 680,46 ຕື້ກີບ ເພີ່ມຂຶ້ນ 102% ທຽບໃສ່ປີຜ່ານມາ. ເຊິ່ງໃນປີ 2023 ທພລ ໄດ້ຂຶ້ນແຜນຍອດສິນເຊື່ອ ຈໍານວນ 21.430 ຕື້ກີບ, ຕົວຈິງສາມາດປະຕິບັດໄດ້ ຈໍານວນ 26.311,79 ຕື້ກີບ ເກີນແຜນທີ່ວາງໄວ້ 22,75%; ໃນນີ້ມີ: 1.) ເງິນກູ້ປົກກະຕິ (A) ກວມເອົາ 99,33% ຂອງຍອດສິນເຊື່ອທັງໝົດ, 2.) ເງິນກູ້ປົກກະຕິ (B) ກວມເອົາ 0,62% ຂອງຍອດສິນເຊື່ອທັງໝົດ, 3.) ເງິນກູ້ທີ່ເປັນ NPLs ກວມເອົາ 0,05% ຂອງຍອດສິນເຊື່ອທັງໝົດ; ສ່ວນທຶນທັງໝົດຂອງທະນາຄານ ມີຈໍານວນ 2.118 ຕື້ກີບ ເພີ່ມຂຶ້ນ 90,7% ທຽບໃສ່ປີ 2022.

ໃນໄລຍະໜຶ່ງປີຜ່ານມາ, ທພລ ໄດ້ສຸມໃສ່ໃນການຈັດຕັ້ງປະຕິບັດຫຼາຍວຽກງານ ເປັນຕົ້ນແມ່ນ ການກໍານົດມາດຕະຖານ ດ້ານການບໍລິການທີ່ເປັນເລີດ ແລະ ຍົກລະດັບພະນັກງານໃຫ້ເປັນມືອາຊີບ, ການຂະຫຍາຍວຽກງານສິນເຊື່ອ ພ້ອມທັງສ້າງເຄື່ອງມື ແລະ ລະບົບທີ່ທັນສະໄໝ ໃນການຄວບຄຸມບໍລິຫານຈັດການຄວາມສ່ຽງໃຫ້ໄດ້ຕາມແຜນ, ສຳລັບວຽກງານບໍລິຫານທຶນ ແລະ ບໍລິການຕ່າງປະເທດ ກໍ່ໄດ້ສ້າງໂອກາດພົບປະແລກປ່ຽນຮ່ວມກັບບັນດາທະນາຄານຕົວແທນ ເຊັ່ນ: ເຂົ້າຮ່ວມກອງປະຊຸມສຸດຍອດຈີນ-ອາຊຽນ (CAEXPO) ທີ່ ສປ ຈີນ ແລະ ກອງປະຊຸມ CAIBA ທີ່ ບາຫຼີ, ປະເທດ ອິນໂດເນເຊຍ ພ້ອມທັງຍົກລະດັບສ້າງສາຍພົວພັນກັບສາກົນ ເພື່ອຮອງຮັບການຊໍາລະສະສາງໃຫ້ຫຼາຍຂຶ້ນ ທີ່ເປັນມາດຕະຖານ ແລະ ສາມາດຄວບຄຸມໄດ້, ວຽກງານໄອທີ ແມ່ນໄດ້ຍົກສູງຄວາມເປັນເຈົ້າການ ໃນການປັບປຸງຜະລິດຕະພັນ ແອັບ LDB TRUST ໃຫ້ຕອບໂຈດກັບວິຖີຊີວິດ ເຊິ່ງໃນປີ 2022 ມີພຽງ 25 ຟັງຊັນ ໃຫ້ເພີ່ມຂຶ້ນເປັນ 45 ຟັງຊັນ ໃນປີ 2023 ໂດຍພະນັກງານ ທພລ ພັດທະນາເອງ ເຖິງ 80%. ສ່ວນວຽກງານການຕະຫຼາດ ກໍ່ໄດ້ຈັດກິດຈະກໍາ ແລະ ແຄ໋ມເປນການຕະຫຼາດ ເພື່ອຄືນກຳໄລໃຫ້ແກ່ລູກຄ້າ ຢ່າງຕໍ່ເນື່ອງ.

ຈາກບາດກ້າວຂອງການປັບປຸງປ່ຽນແປງໃໝ່ຢ່າງຮອບດ້ານ ແລະ ຜົນສຳເລັດໃນໜຶ່ງປີຜ່ານມານັ້ນ ກໍ່ຍ້ອນການຊີ້ນໍາ-ນໍາພາ ຢ່າງໃກ້ຊິດ, ເປັນລະບົບ, ມີວິທະຍາສາດ, ມີແບບແຜນ, ມີການຕັດສິນບັນຫາຢ່າງເດັດຂາດ ແລະ ທັນສະພາບການ ໂດຍສະເພາະຢ່າງຍິ່ງ ເກີດຈາກຄວາມສາມັກຄີ, ມີຄວາມຮັບຜິດຊອບສູງ ຕໍ່ອົງກອນ ດ້ວຍຄວາມເສຍສະຫຼະ ແລະ ການເຮັດວຽກເປັນທີມ ຂອງ LDB TEAM ທຸກຄົນ ທີ່ມີເປົ້າໝາຍ ແລະ ພາລະກິດອັນດຽວກັນ ຄື ເຮັດໃຫ້ ທະນາຄານ ພັດທະນາລາວ ເປັນໜຶ່ງໃນທະນາຄານທີ່ຢູ່ແຖວໜ້າ ເພື່ອກ້າວສູ່ເປົ້າໝາຍ ແລະ ຄວາມສຳເລັດ ແບບຍືນຍົງ.

===========================