ໃນວັນທີ 12-14 ຕຸລາ 2023 ທີ່ ນະຄອນ ປາກເຊ ແຂວງ ຈໍາປາສັກ, ທະນາຄານ ພັດທະນາລາວ ຈໍາກັດ (ທພລ) ໄດ້ປະກາດຜົນກໍາໄລສຸດທິ ປະຈໍາໄຕມາດ III ປີ 2023 ໃນກອງປະຊຸມສະຫຼຸບຜົນການດໍາເນີນທຸລະກິດ ປະຈໍາໄຕມາດ III ພ້ອມທັງສືບຕໍ່ ວາງທິດທາງແຜນການດໍາເນີນທຸລະກິດ ຂອງອົງກອນ ສຳລັບໄຕມາດສຸດທ້າຍ ໃນປີ 2023.

ສຳລັບຜົນການດໍາເນີນທຸລະກິດຂອງ ທພລ ໃນໄຕມາດທີ III ປີ 2023 ນີ້ ສາມາດປະຕິບັດຜົນກໍາໄລສຸດທິ ເພີ່ມຂຶ້ນ ໄດ້ 100,38% ທຽບກັບໄຕມາດດຽວກັນ ຂອງປີ 2022, ຕົວເລກຍອດສິນເຊື່ອສຸດທິ ສາມາດປະຕິບັດໄດ້ 24.126,70 ຕື້ກີບ ເພີ່ມຂຶ້ນ 38,25% ທຽບກັບທ້າຍປີ 2022. ດ້ານຄຸນນະພາບ ຂອງສິນເຊື່ອ ໂດຍລວມປັບໂຕດີຂຶ້ນຢ່າງຕໍ່ເນື່ອງ, ອັດຕາສ່ວນສິນເຊື່ອບໍ່ເກີດດອກອອກຜົນ (NPL) ບໍ່ເກີນ 0,02% ແລະ ສິນເຊື່ອເກຣດ B ບໍ່ເກີນ 0,63% ຂອງຍອດສິນເຊື່ອທັງໝົດ, ຖືເປັນຄ່າຊີ້ວັດທີ່ຢູ່ໃນລະດັບດີ ຫາກທຽບກັບຄ່າມາດຕະຖານທີ່ ທະນາຄານແຫ່ງ ສປປ ລາວ ກໍານົດໄວ້.

ໃນໄຕມາດ III ປີ 2023, ອົງກອນ ທພລ ໄດ້ສຸມໃສ່ປະຕິບັດວຽກງານ ກໍ່ຄື ການສ້າງຜົນກໍາໄລຢ່າງຕໍ່ເນື່ອງ ໃຫ້ປະກົດຜົນເປັນຈິງ ແລະ ບັນລຸເປົ້າໝາຍໄດ້ ໃນແຕ່ລະໄຕມາດ, ບົນພື້ນຖານການແຂ່ງຂັນ ກັບສະພາບເສດຖະກິດ ທີ່ມີຄວາມຫຍຸ້ງຍາກຈາກຫຼາຍປັດໄຈ ທີ່ເປັນສິ່ງທ້າທາຍ ດ້ວຍການບໍລິຫານຕົ້ນທຶນຢ່າງມີປະສິດທິພາບ ແລະ ການບໍລິຫານຄຸນະພາບສິນເຊື່ອຢ່າງຮັດກຸມ. ພ້ອມນັ້ນ, ຍັງໄດ້ຍົກສູງ ແລະ ໃຫ້ຄວາມສໍາຄັນ ຕໍ່ວຽກງານພັດທະນາບຸກຄະລາກອນ ໃຫ້ມີຄວາມເຂັ້ມແຂງ ໃນການບໍລິການທີ່ເປັນເລີດ ແລະ ເປັນມາດຕະຖານດຽວກັນໃນຂອບເຂດທົ່ວປະເທດ. ນອກນັ້ນຍັງໄດ້ໃຫ້ຄວາມສໍາຄັນ ຕໍ່ການສະໜັບສະໜູນທຸລະກິດຄູ່ຮ່ວມຍຸດທະສາດ ລວມທັງບັນດາຜູ້ປະກອບການອື່ນໆ ໃຫ້ສາມາດເຂົ້າຫາແຫຼ່ງທຶນໄດ້ຢ່າງສະດວກສະບາຍຫຼາຍຂຶ້ນ, ບໍ່ຫຼາຍຂັ້ນຕອນ ເພື່ອສາມາດຂັບເຄື່ອນທຸລະກິດໄປພ້ອມກັນ ໄດ້ຢ່າງຄ່ອງໂຕ ແລະ ມີປະສິດທິຜົນ.

ສຳລັບໄຕມາດ IV ປີ 2023 ນີ້, ທພລ ຈະສືບຕໍ່ດໍາເນີນທຸລະກິດ ຕາມແຜນຍຸດທະສາດ ແລະ ວິໄສທັດ ຂອງອົງກອນ ກໍ່ຄື ພັດທະນາວຽກງານບໍລິການ ໃຫ້ສອດຄ່ອງກັບການພັດທະນາ ເຕັກໂນໂລຊີ ໃຫ້ມີຄວາມທັນສະໄໝ, ວ່ອງໄວ ແລະ ກ້າວໜ້າຕາມຍຸກ Digital. ພ້ອມນັ້ນ ຍັງໄດ້ຂະຫຍາຍຕາໜ່າງບໍລິການໃຫ້ກວ້າງຂວາງ, ຄວບຄຸມໃນຂອບເຂດທົ່ວປະເທດ ເພື່ອເຮັດໃຫ້ ທະນາຄານ ທພລ ຢູ່ໃນແຖວໜ້າ ໃນການໃຫ້ບໍລິການ ທາງດ້ານການເງິນ-ການທະນາຄານ ທີ່ດີທີ່ສຸດ ເພື່ອຮັບໃຊ້ສັງຄົມ ແລະ ບັນດາຄູ່ຮ່ວມຍຸດທະສາດ ຂອງ ທພລ ໃຫ້ມີຄວາມປະທັບໃຈ ແບບຕ່າງຝ່າຍຕ່າງມີຜົນປະໂຫຍດ ແລະ ພ້ອມກັນກ້າວໄປຂ້າງໜ້າ ຢ່າງໜັກແໜ້ນເຂັ້ມແຂງ ຕາມຄໍາຂວັນທີ່ວ່າ: “ມິດທີ່ດີ ຢູ່ຄຽງຂ້າງທ່ານ ການຮ່ວມທຶນແບບຍືນຍົງ”.

ldb